إلى أحبتي في المنتدى أتمنى أن تلقى هذه القصيده أستحسانكم ورضاكم..... وهي للشاعر/ عايض الشويب
ياللي نشدتي عن صفاتي كان أعرتلها أهتمام
قدام أبينلك ترى ما فيه شخص بلا خلل
لكن نويت أبختصرلك وأول أحروفي سلام
من بعدها فالحال مستوره ولا منها خجل
ماهو بنا اللي ولدته أمه على ريش النعام
أنا بدوي(ن) ولدته أمه على قمة جبل
من عادتي متسامح ولا طيع مقطوع الرحام
لو جتني الشينه ترى ماني على الشينه عجل
وليازعلت وصلت الدعوى ليا مس الحزام
الله يجيرك تقدر تقولين عاقل وأنهبل
أعشق عبارات الوكاد أحسها رمز التمام
وأخاف أقرر لا صدمت بربما أو محتمل
وأنا نظامي كل شي له بتقديري مقام
أحاول أني لا مشيت أمشي على خير السبل
ماهو بدايم يسلم اللي عادته عكس النظام
لابد ماتعثر قدم تعودت درب الزلل
شاعر كتبت الشعر من صغري وهذبت الكلام
رتبت حرف الحكمه بشعري قبل حرف الغزل
وأنا ليا مني عشقت أنزل على ريع الهيام
ومن لاعرف ويش الهيام يشوف فعله فالأبل
(شعيل) لاهايم لونه كان مردوم السنام
من بعد مردوم السنام اللي على ظهره هزل
يحت وبره من رداه تقول مرجومة عظام
وليا وقف قام يتراقل كن في ظهره حمل
هذا ترا فعل الغرام أن ماتعرفين الغرام
لاتصدقين اللي يقول أن الهوى طعمه عسل
وهذى صفاتي وأدرسيها زين قبل الأنضمام
ترى بعد عقد الحبل ماهو سهل نقض الحبل
أما أقبليها وأقبلي معها تحيه وأحترام
والا الحقي غيرك ترا قبلك كثير اللي رحل
((شعيل)) :: أسم يطلق على الجمل
تحياتي للجميع ...........
17-08-2006, 02:11 PM
ماني بنا اللي لدته أمه على ريش النعام
المواضيع المتشابهه
