هذه القصيده رثاء بزميلنا المرحوم بأذن الله مزيد بن حزوم الذي وافاه وزوجته الاجل أثر حادث سياره اليم.
الله يرحمك يابوحزوم.....
جــاني خبر منه الضمــاير غدت نار
تقــول في جــوفـي تــشــب الدوافــيــر
خطرٍ على روحي مـن العـلم تنهــار
وخـطـرٍ على قلبي من اضلوعه يطـيـر
قالوا توفــا مكـرم الضيـف والجــار
الـلي حــجــاجــه ضاحــكٍ للـمســايـيـر
قالوا توفا راعــي الطــيب والكــار
نســل الرجـــال اللي تهـز الطـوابيـــر
والله كــن المــوت يانــاس يختـــار
مايــاخذ الا من هـل الطيـب والخــير
مرحوم يـامزيـد عدد وبل الأمطــار
مـرحــوم ياللي مــاتحســب المخاسـير
مرحــوم ياالفزّاع ..ياالصاحب البار
مرحــوم يانســل الرجــال المنــاعيــر
الكـل يدعي لك مـن صغـار وكبــار
لـك في قـلـوب النــاس حـبٍ وتقــديــر
يبكي الوفـا يبكي النشـامـا والأخيار
كــلٍ دمــوعه فــوق خــده مـحــاديــر
يبكي الكــرم..تبكي معــاميل وأوجــار
تبكــي المجــالــس والــدلال المباهــير
ارثيــك ودمــوعي على الخـد نــثــار
وحـزني تـرى مايــنوصف بالـتعـابيـر
ادري بأن الموت قصّــاف الأعمار
مؤمــن وراضي بالقـضــا والمقــادير
لكن فـقـدك غير عن كـل مــاصـار
بـس الـقـضــا لاتـم مــافيه تــغيـيــر
ياالله عسـى قبرك على مد الأنظار
يــارب بــدّل ظـلـمـة القـبـر تنـــويــر
ياالله عسـى الجــنه مقرك ولك دار
بأمــر الكــريم اللي عـليــه التـدابيــر
وختامها صلوا عـدد طــايرٍ طــار
على الــنبي عــداد ماغــرّد الــطيــر
الشاعر : سعود
28-12-2005, 01:59 PM
قصيده رثاء
المواضيع المتشابهه
.. قصيده مليئة بالأحاسيس
