قلت آه من صبر صبرته على الكود
ومن ونهٍ للقلب جاحت وقدّت
ونه عتب ونّه غضب مالها حدود
ياليتها عن مغلق الصدر صدّت
لو هي بحيدٍ ذّوبت كل جلمود
على الضماير بالهضايم تحدّت
قامت تعرّض لي بالايام والسود
ان قلت قفت عوّدت لي وردّت
وان قلت هانت بالحشا جابت الزود
وجاحت خفايا ضامري واستجدّت
وزادت جروح القلب بجروح ولهود
ودنياي مالت عن سنعها ولدّت
والعين كن بنونها ملح بارود
على السهر كل الليالي تحدّت
تسهر وبعض الناس هجاع ورقود
وهي تبي فرقاه مافيه لدّت
ونشدت ياتركي عن اللي بهم جود
وقالوا ضعون اهل المروات مدّت
العدل من شدّو مع الناس مفقود
وبفعالهم عمسين الاريا تقدّت
منزالهم خالٍ تصافق به النود
من يوم عنه اسلاف الاجواد شدّت
اقفوا عن الدنيا هل الخيل والقود
اللي فضايلهم على الناس بدّت
الناس بالايام طارد ومطرود
ياليتها باهل المروة تحدّت
وطير الفلاح اللي عن الصيد مردود
عقبه تبوع علمت واستهدّت
اشوف ناس عندها الحقد ماجود
ونفوسهم عن كل عليا تردّت
العدل في ساحاتهم صار مفقود
وعن الفضيله جنبت واستردّت
مايرفعون النفس عن كل منقود
ان ما تعشت عرضها له تعدّت
تعطي عن العليا محاريف وصدود
ووجيهم ماقيل بالجود ندّت
الشاعر
محمد بن احمد السديري
رحــمه الــلـــــه
28-11-2005, 10:39 AM
آه من صبر صبرته...
