قصة الامير والبدويه القبيحه

[~*~عاطفية~*~]

الصباح بعد الفطور جلست جنب جدتي اسولف معها وامزح واقولها انتوا يالبدويات من اول ما تعرفون الحب ولاتعرفون الغراميات ذي, حدكم حد الغنم , تبسمت وقالت لي اسمعي ذي القصه .........

كان من اول فيه بدوي عنده بنت وولد وبحكم البداوه كانوا يتنقلون من مكان لمكان , في يوم من الايام لمى بنوا بيتهم ( بيت شعر) في الوادي , نزل عليهم تالي الليل مطر وجاهم السيل وكتب الله تغرق الام وزوجها , اما البنت والولد فكتب لهم الحياة وشافهم شيخ من اشيوخ القبايل ,هو واصحابه فقرر انه يربيهم مع اعياله وكان للشيخ ذا اربع عيال وبنت , مر الزمن وكبروا البنت والولد بين عيال ذا الشيخ , البنت يوم اكبرت ماكانت بذاك الجمال كانت كانها عجوز بال.....15 من عمرها .اما الولد فزوجه الشيخ بنته الوحيده اللي كانت في غايه الجمال والذكاء , وطبعا بعد زواج الولد ببنت الشيخ قرر الولد يغير الديره ويأسس عائله واكيد اخذ اخته الوحيده معه, مرت اسنين والبنت ما جاء يخطبها احد ولا فكر فيها احد لانها ( قبيحه المنظر) اما قلبها كان رقيق وطيب وحنونه , علشان كذا صارت الام الثانيه لعيال اخوها , بنت الشيخ اللي هي ( زوجت اخو البنت القبيحه)كانت انسانه طيبه وذكيه , يوم من الايام سكن الخ واخته وزوجته وعيالهم جنب احدى المدن بغرض ان رب الاسره اللي هو اخو القبيحه يحضر سوق الغنم يوم الخميس والجمعه ( يتجمعون اهل الباديه فيه بوسط المدينه) وفي ذاك اليوم طلع امير (احدى القبائل المعروفه) ومعه الخوي وشاف الامير زوجه اخو البنت والبنت والعيال حولها(حول البنت القبيحه)وانفتن في زوجه اخو القبيحه اعجبه جماله وحسن طلتها وماكان يعرف منهم , عشان كذا وصى خويه انه يسال عنهم وسال الخوي وجاه خبر انه اخت واخو وزوجته وعيالهم عايشين في بيت واحد , وطرى في باله ان البنت الحلوه هي اخت الرجال لان البنت القبيحه كانوا العيال معها وشايلتهم ( اعتقد ان البنت القبيحه هي زوجه الرجال وزوجه الرجال هي اخته ) فقال لخويه امش خلنا نخطبها .... وفعلا اخطبوها ووافق الاخو باستغراب, وطللب الامير انه يعرف راي البنت بنفسها وراح الاخ يسال زوجته وش السواه قالت ما عليك قوله يروح للرجم الفلاني اذا لقاها عنده فهي موافقه واذا ما لقاها فهي رافضته . وافق الامير على ذي المشوره على اساس انه ما يخجل البنت, فراحت البنت القبيحه مع زوجة اخوها وعيال اخوها للرجم وقالت زوجة اخوها للبنت امسكي العيال وانا بوقف ولا تهتمين ان جانا احد ووافقتها البنت , فمر الامير وخويه من جنب البنات وسلم وسألهم وين بيت فلان فجاوبت زوجه اخو البنت وقالته على المكان اللي يبيه , وبعدها تولع الامير بزوجه اخو البنت (اللي يحسبها اخت الولد) وطلب تعجيل الزواج وفعلا صار له اللي يبي ولد اشيوخ من يرده............ ولمى صارت البنت القبيحه ببيت الامير وانكشفت الحقيقه للامير زعل ولكن مسرع ما هدى لان محد ضحك عليه ولا حد كذب عليه هو اللي اعتقد بنفسه , قعد يضحك الامير والبنت القبيحه كانت خايفه ما يتقبلها , لكن مسرع ما تبدد خوفها لان الامير طلع ولد اصل وقالها ان الشكل مايهم له المهم طيب النفس (مع انه قال ذي الكلمه من ورى قلبه الا انه عمره ماندم عليها) عاش الامير مع ذي البنت وهو يغليها غذت روحه بالمحبه برغم نقصها للجمال الظاهري...عاشت له ولعيالهم تراعيهم وتهاديهم حتى بدى الشيب براسه فكتب رب العباد ان البنت ذي تسلم روحها لبارئها وتترك عيالها رجال وبناتها حريم وزوجها اللي يقول ما اثرن فيني البيض الكحيلات زي ما اثرت فيني البدويه القبيحه ذي اللي ربي انعم علي بوجودها ببيتي.....



( ما حبيت اذكر اسامي ....... والقصه تراها حقيقيه...........وياماحلى غرامياتكم ياجتدي وعسى الله يحفظك لنا )........اعذروني على الاطاله بس حبيت تعرفون ذي القصه اللي اثرت بحياتي كثير..عمر الشكل ماكان اساس من اساسيات الحب.

 

 

[Nathyaa]

هذا الحب الصح

يسلمووووووو حياتي علي القصه

[~*~عاطفية~*~]

نورتي يا نثية

[َQADSAWY Q8]

ميس ثااانكس علي القصة الحلوة

[َQADSAWY Q8]

ميس ثااانكس علي القصة الحلوة

[~*~عاطفية~*~]

العفووووووووووووووو نورت