مصادرة صبغة للشعر

[kuwait]

الله يعطيج العافيه يا مراقبتنا الغاليه على نقل الخبر

[Nathyaa]

بدليه افندي :

هذا شي اكيد

وانتي بعد لا تستهيينين بالاكسجين ياقلبي

فديتج وفديت هالطله العسل

[Nathyaa]

كويت :

الف شكر لمرورك الرائع

[الذهبي]

نثيه : هناك العديد من السلع والمنتجاب الواردة لدولتنا الحبيه ما تكون رخيصة جداً في جودتها

ولم يتم الكشف عنها إلا بعد ماتتم العمليه بإخطار قد لا تحمد عقباها

** مختصر مفيد **

الواقع هنا في دولتنا هو (( أربح صديقي لأكسبه أكثر فأكثر ولا أربح شعبي بل أفيدهم بنقص في أعمارهم وزيادة في أمراضهم ))

لا هنتي على مواضيع شيقة

دمتي تجلبين لنا ما هو رائع ومفيد وناصح

الذهبي

[Nathyaa]

الذهبي :

بس هذا اكبر غلط

حرااااااااااااااااااااااااااااااااااااام

مثل الفتره اللي طافت يوم ماتت بنت ام 3 اولاد بسبة حبوب تايلند

ملوا الاطباء والناس وهم يقولون يا حكومه هذا مضر للصحه

اذن من طين واذن من عجين

الي ان ماتت البنت وقدمت شكوي من اهلها

اخر شي تم تجميع العينه الموجوده بالسوق واتلافها

طيب وينهم من البدايه

اكبر غلط

يعطيك مليون عافيه علي مرورك الرائع يا ذهبي

[الذهبي]

نثيه تدرين الأدوية اللي عندنا بالكويت من أردى الأدوية

ليش

لإنها رخيصة بأسعارها .. وطويلة بمدى فعاليتها .. ولو ترين بأن الدواء يحتاج لأسبوع أو أقل بقليل أو أكثر بكثير

المال غالي وحياة البشرية رخيصة

شفتي شلون

وما أعظم من المستخبي

وهم الذهبي

[Nathyaa]

قمه بالسخريه للاسف

مع العلم ان احنا باغني دول العالم

اقولك شغله

مستشفياتنا فيها اروع الادويه وافضلها بس للاسف قاعده توزع من تحت الطاولات

السؤال ليش ؟؟

حتي بالادويه فيها واسطه

لاحول ولا قوه الا بالله

مره صار لي موقف

رحت مستشفي مبارك عيادة السكر موديه الوالده وفيها مرض السكري

نصحها الطبيب بدواء نوفو ماكس وقال لها هالدوا موموجود بالحكومه روحي الصيدليه اشتريه

وديتها الصيدليه واشتريت لها الدواء بحدود 18 دينار

بعدها تقريبا باسبوعين قاعده اسولف مع صديقه لي تشتغل بمستشفي الاميري

ومع السوالف ذكرت لها هالسالفه من عرض السوالف

تدري شنو اجابتها ؟.؟

بالحرف الواحد :

والله من صجج ؟ يعني ماتدرين كل شي عندنا ؟

عطيني اسم الدوا وانا باجر ايبه لج

بعد مرور يومين احضرت لي 5 علب من نفس النوع

ماذا تسمي هالمهزله ؟؟

علي فكره احسن الادويه موجوده بس مثل ماقلت لك توزع من تحت الطاولات

[VIP]

يعطيج الف عافيه على نقل الخبر فعلاً خبر خطير الله يعد خواتنا المسلمات عنه

والمصيبه الكبرى ان ثلاث ارباع العالم يستعملون صبغ الشعر بس والله اعلم ما عتقد جميع انواع

الصبع اعتقد نوع معين والا شرايكم اخواني ؟

تحياتي لج .

[Nathyaa]

اكيد نوع معين اللي يسبب الوفاه

بس علي العموم الاصباغ بانواعها مواد كيميائيه وضاره

في طريقه افضل من الصبغ

اللي يبي يخش الشيب اللي براسه

هذي النصيحه للشياب هههههههههههههههه

حنه مع ملعقتين قهوه تركيه

يعطيك اللون البني الغامق اللي مائل الي السواد

[الذهبي]

للأسف ماتدرين شنو داير بهالبلد يانثيه .. أنا أعرف دكاتره من العائله وبرا العائله .. يقولون الذهبي وربي عندنا 80% من الأدوية تعتبر من أردى الأدوية بالعاالم ليش لرخص منتوجها ..

أقولج سالفة بسيطة عن مستشفيات الكويت .. بس أعتقد راح أملي الصفحة

القصة الأولى

عندي واحد من الربع توه متزوج وحملت مرته وكان شغله كله بمستشفى الراشد .. وفي يوم من الأيام مرته قربت تولد فجأه راح أقرب مستشفى عند منطقتهم واهو مستشفى الفروانية .. وصل للمستشفى ودخلوا مرته غرفة العمليات على طول 5 دقايق ويطلع الدكتور .. قال لرفيجي أبيك توقع الحيييييييين .. انصدم رفيجي قال شوقع عليه قال وقك مالكش دعوه .. رفيجي مايدري شيسوي قال انزين شوقع عليه .. قال توقع على حياة زوجتك ولا اترك الورقة وخلها تموت .. قال ليش شفيهااااااا قال الدكتور نزيف حاد واذا ماوقت 5 دقايق وتتوفى زوجتك .. ووقع الريال على الورقة .. واهو مايدري المسكين .. بعد 4 ساعات طلع الدكتور .. وقال الحمدلله تم إنجاز العمل مبروك .. قال رفيجي شعليه قاله وبكل برود تم إزاله الرحم والحمدلله .. شفتي قمة المجزرة اللي دايره بالكويت
دخل رفيجي واهو ميت من القهر .. دخل على زوجته المسكينه واهي ماتدري .. اهي دخلت المستشفى بسبب الولادة ويابت بنتين توأم
وقعد عند راسها واهي ماتدري .. بعد ساعتين قالها الخبر .. قال ترى سولج عمليه إزاله رحم .. واهي عمرها أعتقد 22 سنه أول ولادة لها .. شصار بالبنت .. شلل كامل من الصدمة ... .. باللأخير رد مستشفى الراشد وقال الاستشاري العمليه هذي ماتحتاااااج أزاله رحم .. وانا راح أرفع أكبر قضية تشهدها الكويت على الجزار هذا .. قال لا يبا مانبي قضايا أنا أعرف شالحل .. رد لمستشفى الفروانية وخلا الدكتور معوق :) .. زين يسوي فيه



*

سالفه ثانيه
ولد عمي كان فيه سرطان خبيث بالمخ كان يعالج بلندن من قبل الغزو ومع الفحوصات بالكويت وتقارير كل شهر يدزها لندن يشوف في تحسن ولالا .. ويمر على مستشفى الألماني بالرياض .. مره قاعد انا وياه بدجتهم قبال بيتهم قاعد ألعب معاه جنجفه
ثواني وأشوف عيون ولد عمي بيض كلهم صاروا بيض ودم يطلع من حلجه أهو بعز شبابه عمره وقتها 23 سنه قبل جم سنه هالسالفه
أخذناه على طول لمستشفى الفروانية .. قعد جم يوم تحت الملاحظة .. بعد أسبوع قال الدكتور ترى ولدكم ماله علاج بالدنيا كلها قال عمي ليش قال ألحين فيه جرثومة بالمخ من أسرع وأخبث الجراثيم بالعالم .. قال عمي تعال دكتور .. يا الدكتور ورى عمي .. قال أنزل تحت السرير نزل الدكتور تحت السرير شاف زهيوي لامله زهيوية تحت السرير .. اهني اكتشفوا ان الجرثومة من الوساخة بالمستشفى دخلت عن طريق البربيش اللي موصلينه بصدره .. تحجى بالموضوع الشيخ محمد العوضي بالتلفزيون أيام الرمضان
وشاف بعينه المصايب بهالمستشفى .. والولد توفى والله يرحمه

سالفه ثالثه

ولد عمي نسيبي كان فيه سرطان خبيث بالنخاع الشوكي .. قالوله مستشفيات الكويت .. أنت المفروض تقعد داخل بيتكم وماتطلع لإن مالك علاج بالعالم كله .. الريال راح أمريكا ولاية منسوتا بمستشفى مايو كلينك من أقوى المستشفيات العالم اهو الأول
سووله عمليه زراع نخاع شوكي ورد الكويت وألحين أحسن مني ومنج .. ماشاءالله

سوالف وايد والله أتعب وانا أكتبهم

الذهبي