كتبت الشعر مو لجلك ولكن فاض بي بركان..
واما أنتي فلا تسوي قصيده في نظر عيني
حلفتي لي تصونيني اذا صار الزمن خوان
وأول ماعثر حظي على دربك خذلتيني
كسر رمح الزمن صدري وجيتك اشتكي حيران
نزعتي الرمح من صدري وفي ظهري طعنتيني
خسارة كيف حبيتك؟! نعم والله أنا ندمان
غبي أدري نعم ادري ما دام أنك سكنتيني
ثلاث سنين من عمري وانا في لعبتك غرقان
أشيل الشوك من دربك وجرحي كان يدميني
وكنت أبكي إذا تبكي واكون لبسمتك فرحان
وكنت أقرب من رموشك لعينك يوم تبغيني
عرفتك للأسف صحرا وحولتك إلى بستان
وشلتيني غصن أخضر وفي صخرك زرعتيني
حفرتك داخلي ظني تصوني عشرتي أزمان
وكنت أحفر قبر موتي على ساحل شراييني
على كف الشقا نامت جروحي والألم سهران
يحطمني .. يبعثرني .. وفي صحراك يرميني
ولكن عزتي تفرض اكون بدنيتي سلطان
وإن ظنك أجي أركع لرجلك.. ماعرفتيني
أنا ماعادتي أشحت من أمثالك رضا واحسان
أموت بعزتي أرحم ولا ذلك يغطينــي
وما دام الوفا عندك يدور له على عنوان
بدور لي على قلب يصون الحب وسنيتي
ولو قلبي ذكر حبك بولع فيه بالنيران
وبكسرها أنا رجلى اذا صوبك توديني
ولو دار الزمن ضدك وجيتي تطلبي الغفران
وجبتي الشمس في كفك لعندي.. ما بتلقيني
تقول الناس في وصفك: جميله مثل عود البان
وإنك أجمل وأحلى بشر مخلوق من طيني
وإنك غاليه وأثمن من الياقوت والمرجان
يقوم الكون من شانك وتقعد لك بلاديني
حسااافه غرهم شكلك, وياما تخدع الألوان
عموما.. قد بقت كلمه أخيره لك وسمعيني
إذا كنتي بنظر غيري ملاك في شكل انسان
قسم بالله ما تسوي قصيده في نظر عيني
29-08-2005, 11:55 PM
بكسرها انا رجلي اذا صوبك توديني
المواضيع المتشابهه
