خلص العام الدراسي وطلعت راسب في الامتحان
رجعت البيت وحصلت الاسد منتظرني وهو غضبان
اتاريه عارف بالنتيجه من ابن عمي شحفان
قلت في قلبي: بوريه الدب دومه شغال فتان
عطاني الوالد كفين وبوكس وقال لي: ما في منك فايده انته ولد خربان
تميت بغرفتي فوق سريري ملان
اسمع اغاني ايرانيه لعلي دريان
قلت: شو يقول هذا بعد... والله انه مغني تعبان
قلت لنفسي: اسمع يا ولد روح شغل الكمبيوتر بدون ما يدري ابوك الطفشان
فتحت باب غرفتي وركضت شوي شوي مثل ركضت الفيران
وصلت للكمبيوتر وفتحته وانا اضحك مثل السبلان
قالي الكمبيوتر: يا هلا والله دومك مو شايف خير يا جربان
قلت له: سوي الكونكشن وانته ساكت لسانك طويل ما منه أمان
قالي: عشان ابوك الطيب بسويه لكن انته ولد فسدان
دخلت النت وفتحت على الشات الي بالناس عمران
حصلت اسامي وايد دلوعه سمسومه ونمله ما ناقص الا أشوف عايله خان
جلست ادور وفي النهايه طاحت عيني على وحده مسميه عمرها كهرمان
سويت كليك على اسمها وكلمتها برايفيت .... وقلت لها: يا هلا والله بالرمان
تميت أدعي يا رب ترد على وتكلمني تراني وايد عطشان
نطرت وبعد 5 ثواني حصلت رد صغير وحلو يقول: تسلم لي يا جنتل مان
قلبي دق وطرت من الكرسي مثل الغراب الفرحان
قلت لها: من وين انتي يا زمرد يا فرقدان ؟
ردت على من البلاد العربيه ... وانت يا فلان؟
قلت لها: من بلاد العرب المليانه ظلم وطغيان
قالت لي: صدجت ...والله انك انسان فهمان
قلت لها: شو اسمك وكم عمرك ووين تدرسي ؟؟ اذا بالامكان
بعد هذا السؤال سالت نفسي ..انا شايف خير ولا بعدني جوعان
ردت على وبكل ذوق ...انا اسمي (........) 22 سنه ..جامعيه وانت يا فلان
قلت: أخ هذي اكبر مني وجامعيه بعد وانا بعدني احوس في الثانويه مثل الجربوع العرقان
رديت عليها وقلت: انا اسمي (......) 23 سنه ..واشتغل في مدينه كان
وانا بيني وبينكم ما اعرف شو هذي كان ووين موجوده بس سمعت انه يسوا فيها مهرجان
قالت لي: وشو تسوي يا (......) في كان
قلت لها: الوالد عنده فندق ومخليني مدير عليه وفي الحقيقه الوالد دومه طفشان
قالت لي: على كذا اكيد لفيت أوروبا وانت حيران
قلت لها: انا ما احب اروح الا لندن وباريس مع اني ما رحت الا السودان
قالت لي: اكيد كونت صداقات في وايد بلدان
قلت لها: اتعرفت على كثير بس ما اذكر الا جون وميتران
وانا صراحه ما اعرف الا واحد مأذيني اسمه عصمان
كل يوم يتسلف مني على باله بسوي شركه ألبان
سألتني شو نوع السياره الي تسوقها يا (.......) يا ابن فلان
قلت لها بورش موديل 2002 وانا ما اسوق الا بيك اب موديل 79 مال ايام زمان وزمان
قالت لي: الله يزيدك من نعيمه كمان وكمان
ما انتظرت ردي وسألتني ....انت مرتبط ولا بعدك عايش في عالم العزوبيه والتوهان
قلت لها: انا وحيد وما في حد يشارك قلبي بالأحزان
قالت لي: انا هنا جنبك ما رحت ولا بروح مكان
رديت عليها وقلت: انا كلني لك قلبا وعقلا ووجدان
قالت لي: ابي اسمع صوتك تراك وايد عجبتني حسيت انك انسان فنان
قلت لها: وانا اكثر لاني صرت بحبك هيمان
بس اخاف تسمعي صوتي وتقولي شو هالطرزان
قالت لي: ولا يهمك انا قابله فيك حتى لو كنت حيوان
عطني رقمك وانا اتصلك خلال ثوان
قلت لنفسي: خلاص البنت ذابت وصار حبي في قلبها مليان
توني بكتب الرقم واحس بهالساطور فوق كتفي غليان
رفعت راسي فوق مثل الاهبل فزعان
ما اشوف الا الاسد جاي لي من عرينه زحفان
قالي يا ملعون يابن الملعون جالس فوق الكمبيوتر مثل البريعصي الهربان
امشي للغرفه بوريك انا بخليك تغني اغنيه كنت نسيان
وهو يسحبني من رقبتي مثل الكلب الصعران
حصلت رساله منها تقول: وينك حبيبي عطني رقمك خليت قلبي ولهان
قلت: مسكينه حبيبتي انا رايح جهنم وهي تحسبني في كان
وما اقول الا آه منك يالشات خليت الناس عايشين في
عالم الكذب والخذلان
من عسوووله
03-01-2005, 09:06 PM
المواضيع المتشابهه
