مزنه وفادي...(( مسرحيه ))
الحب الحقيقي
قصة من واقع الخيال دارت أحداثها في زمن التضحيه وحب الذات
مسرحها الحلم وسيناريستها العصر ومخرجها اخر الطب الكي .
الابطال
مـــزنـــه
شابة جلفه نشأت وترعرعت في كنف جدها المصون ابو ام مزنه شخيبر
تعلمت في مدرسه الحياه ، نضج عقلها في مقتبل العمر وكانت مسترجله نوعاً ما
فـــادي
شاب وسيم جابته امه في صيدا رومانسي حالم نعووومي نوعاً ما يأكل بشراهه
اكمل تعليمه في الجامعه الاجنبيه وحصل على ليسانس موسيكا ===> موسيقى
المشــــهد الاول
======><========
تزوج فادي مزنه او بالاحرى تزوجت مزنه فادي اجباري لحيث ====> يااهوووه
لحيث ان فادي ولد عمها المهم اخذ مزنه اللي ما تعرف من الاتيكيت حتى أسمه ومع ذلك
أحبها لبساطتها وعفويتها وسرقت قلبه يوم الله قرد حظه
المشــــــهد الثاني
تخيلوا صورة ستاره حمراء
=========><===========
عزم فادي ====> ماهو بسيط يعزم .. عزم اصحابه مراد و ورامي ولؤي
اصدقاء الجامعه عزمهم وحلف عليهم الا يشربون قهوته ، وطلب من مزونته ==> يدلعها ولا هو راكب عليها الدلع يامال فرقاء العين يا مزون
طلب منها تضبط له القهوه والحلا وده يسوي حركه ونص قداام الشباب
مزنه بنت اللذينا هاك اللحظه ماهي فالفورمه قالت مالك لواء ===> كنايه عن لا
قال ايش ، قالت جاك العلم عظامي توجعني ولافيه اروح للمطبخ خل اخوياك يضفون وجيههم
اللي كأنه عيال البلوت ، حاول معها ترجاها بيضي وجهي صنقرت مزون وقالت لله
والله لو يجي ابوي .
فادي ابن حلال بالعربي اجودي يعني رخمه ====> كذا واضحه راح يسحب كرعانه لخوياه اللي سمعوا كلامه وحرمه المصون
اخذوا الشباب يعلقون عليه لين راح وجيهه هالكبر المهم ليه نطولها راحوا من عنده
ثم رااح لغرفته وصك عليه الباب وقعد يبكي ويعيط ويصيح وينوح وياليل ما انت ليل
مزنه متمغطتٍ تحت التلفزيون وتتابع القنوااات اللي ما عمرها شافتها .
المشـــــهد الثالث
======><=======
قامت ام الحلا مزنه وراحت لفادي في غرفته ولقته مغرقٍ الغرفه بدموعه ====> يا كبدي عنه
وشفيك يا فيدي تدلعه ====> امحق دلع ما رد عليها فااادي وهنا
جن جنونها اكلمك ماترد انت ووجهك الباارد والله ما اجلس عندك و على التلفون
وتدق على اخوها ابو داااحم اللي ما صدق خبر يجي يمشي 140 ويخطفها
وعلى بيت امها .
فادي ليلته قضاها في نكد وخوف ودموع وسهر ====> ما يناام لحاله الولد يخاااف
بعد كذا يوم رق قليب فادي وقرر ان يتنازل عن كبرياءه و يرسل لمزنه ===> حبيبة القلب
ارسل لها بعض الجاهيه بالرساله الاتيه :-
أخذوا سلامي وارسلوا به لمــــزنه
.............. لعلها ترضى وترجع علينا
قولوا لها فادي فقد نص وزنه
............. وعاف الكرى والضحك واصبح حزينا
وانتي سبب سهره وهمه وحزنه
.............. وحنا على شأنه تعبنا وجينا
المشــــهد الرابع
=====><==========
وصلتها الرساله وقبل يرجعون الجاهيه قالت استلموا الرد اللي ما غير هو
قولوا لمن صاغ القصيده على أزنـه
.............اسمع كلامي وافهمه يا فطينا
والله لو دمعك مثل وبل مزنه
.............. اني فلا ارجع يم ذاك المتينا
حتى يحضر لي من المال خزنه
............... مليانةٍ من كل شئٍ ثمينا
راحوا بردها ووصلوه لفااادي اللي تفاجأ بهالرد ومع هذا حاول ان يلبي
مطلبها وفزع لاصحااابه اللبنانين اللي هاك اليوم ما قهواهم
ولقااهم زعلانين ولا عطوه وجه حاول وحاول وحاول
وبعد ان فقد الامل وعاااف الحياااه كلها ====> ترى ما تسوى يا فدفد
زعل من كل شي حتى حبيبة قلبه مزنه
وارسل لها بعد ان طفح الكيل وقال :
ما دام لاحلوه ولافيك رزنه
................ طسي عساك بروحتك ما تجينا
مزنه قلبها حجر ما عليها من شي ردت وهي واااثقه من نفسها مرررره وقالت
تكفى يا شيخ القوم يا سيف يزنه
............... من زين وجهك يالهبيل السمينا
ومضى الوقت ومزنه في بيت امها وبدت عليها أثار الهستره
اما فادي اللهم لك الحمد عانا كثيراً من الوحده واصبح جلد وعظم
وانبدل اي اصبح ====> مبدولاً =====> خبل ختاما تقبلوا تحيااات المخرج والمحرر والمصور والفريق كاااملاً
والى اللقاء في المسرحيه القادمه
حقوق النشر محفوظه
مع تحياتي اختكم الزين
02-11-2004, 09:49 AM
المواضيع المتشابهه
