القصة هي بكل طيبة العشاق .. للكاتب/ه : (ريح الخزاما) ..الجز الاول:

[غفران-الامارات]

السلام عليكم ..
قصة حلوة قريتها في منتدى وحبيت انقلها لكم




تعيش النفوس تعشق وتود ..فطره فطرنا الله عليها .. والفا بين قلوبنا بها..
عاشت حصه بين اخوانها واهلها وعمها وعيال عمها .. من يوم وهيه صغيره كانت حصه بنت عاقل رزينه الكل يشهد بأخلاقها وادبها ..
حصه انولدت بين اخوانها..عندها اختها الكبيره مريم واخوها الاكبر محمد و اصغر منها خالد وناصر وعبدالله بالترتيب..
عمها عبدالله من استواو وهم ييران... فلة ابو حصه (راشد) وفلة عمها (عبدالله )مطابجات ماامبينهم الا يدار واحد وفاجين باب بين الفلتين ..وعيالهم من استواو وهم اخواان اكلهم ولعبهم ودراستهم وحياتهم وحده وبعد في شي ثاني يجمع بينهم اكثر واكثر..!! حرمة عم حصه تستوي اخت امها لحصه..!! : يعني العايلتين مافيهم فجه.
بنات عم حصه روضه وظبيه توأم عمرهن من عمر حصه ..بناات في الثانويه العامه في نفس الصف .... حصه من يوم هيه اصغيره كعاداااتنا طبعا كانت محيره لعيال عمها... وموعود واحد من عيال عمها ابها من تخلص الثنويه العامه ..وطبعا عبدالله عم حصه يبى يفرح بعياله ويشوف اعيالهم ..وتقرر ان خليفه ولد عبدالله ياخذ حصه.. ومنو الي قرر هالشي ؟؟...عبدالله عم حصه وابوها طبعا .. بس محد شاور حصه ولا حد شاور خليفه ...والمقرر ان يكون عرسهم بعد ماتخلص حصه الثانويه العامه..!!
خلفيه ريال ونعم فيه خلص دراسته ورجع من استراليا من سنه ..وتوظف على طول ..
بس خليفه مافكر انه يعرس ولا حط في باله" حصه " لان كان الكلام ان واحد من الاخوان يتزوجها... بس مايعرفون منو.. احمد اخو خليفه اصغر منه عرس من سنتين وخالد يدرس في الجامعه .

بعد المغرب كانت حصه وظبيه وروضه يدرسن في ميلس بيت حصه .. دخل عليهن عم حصه عبدالله وسلم على البنات ..
عبدالله (بو خليفه): سلام عليكم ..
ماشالله على اليواري قطعتن الكتب ماتسوى عليكن هالدراسه ..باجر كل وحده منكن بتعرس وبتسير بيت ريلها ... خفن على عيونكن باجر بيصبح الريل يقودكن شرق غرب وانتن مااتدلن وين تحطن اريولكن.
ضحكن البنات على رمست بو خليفه ونشن يسلمن عليه
حصه: مرحبا الساع بالشيوخ ..
وايهت حصه عمها وحبته على راسه وبنات عمها بالمثل
سلمن على ابوهن وحبنه على راسه
يلس بو خليفه وياهن ويلسو يسولفون لين ما ياهم ابو محمد ..(ابو حصه).يلسو كلهم يميع
بو محمد: علومك بو خليفه ... وعلوم الرجاب..؟
بو خليفه : علوم الخير طال عمرك..والرجاب امبيضات الويه مب قاصر عليهن شي..و بنت صوغان بعناها بقيمه زينه .
روضه : الحين فجو موضوع الرجاب والبوش الله يعينا
بو محمد: ههه عنبوه ياروضه وشو بلاهن الرجاب والبوش اهلج ويدودتج عايشين عليهن وناكل ونشرب من خيرهن
بو خليفه: فديتن والله بوشي ورجابي حرام ان غلاتهن من غلات اعيالي
ضحكو كلهم على رمسة بو خليفه
حصه: عمي ترانا نغار ... لعنبوه استوينا انحن والبوش بنفس الغلا..!! ههه
ظبيه: لا وبشرج بعد حصوه ...البوش استون عدايل امايه ابويا يهتمبهن اكثر من ما يهتم ابحرمته ههه
بو محمد: لالا بوشنا وحريمنا واحد مانفرق امبينهن كلهن نفس الاهتمام.

حصه: ههه ابويه انحن ماقلنالكم تعدلون امبين حريمكم وبين بوشكم ههه انحن نباكم تودرون هالبوش اشوي وتريحون عماركم.. ويشل كل واحد منكم عيوزه ويحوطبها ويفري عنها في لبنان وسوريا والا فرنسا ..هنوهن اشويه ههه

روضه:يبالهن سيره لبنان فديت روحن يردن شبابهن شويه ههه
بو خليفه: وشو مستوي عليهن بنات مبارك بعدهن غزلان يتيولن كل وحده منهن لو تفجها في مركاض يابت الاول ماشالله عليهن.

بو محمد :لا لبنان ولافرنسا... بنوديهن طال عماركن العزبه يومين وبترد الصحه فيهن وبيشربن اللبن وبتهبهـن المهب وجان عـ هالشعرتين البيض بيحننهن وخلاااص.

ضحكن البنات على سوالفهم وقامن عنهم عسب يسيرن يخلصن ادروسهن
في الميلس.. فتح بو خليفه موضوع عرس خليفه وحصه
بو خليفه: بو محمد ترا ولديه خليفه طالبنك ..الريال يبى يعرس وانحن حصه بنتنا وولد عمها اولابها من الغريب ... والريال خلص الي عليه وجاهز بالي تطلبونه وحصه بنتنا مابنقصر عليها ابشي وبتظهر من بيت ابوها وبتحدر في بيت ابوها الثاني

بو محمد: الساع مابتحصل اخير من خليفه ولد عمها ورااابي وياها ..والبنت ماتبى عليه شي ولو يباها الحين يملج عليها ويشلها بكندورتها الي عليها .. افا عليك يا بو خليفه هاي بنتك .

بو خليفه: إلا حرام عليه اني اسويلهم عرس لا استوى ولابيستوي شراته.. واخلي الناس ترمس عنه دامنها حيه.. وحصه لو تبى اعيونا مابنبخلبهن عليها.

بو محمد: طولي الله بعمرك يابو خليفه.. مايهمنا المظاهر يابو خليفه ..المهم راحة اعيالنا والله يوفقهم ويهنيهم.

بو خليفه :امين يارب..طال عمرك بيت خليفه جاهز ماباقي الا الديكورات والسامان الباقي
وبنتنا من تخلص تزدهب ...هيه وخواتها وياها بيفازعنها والبيت من الحين تحت امرها تعدله على ماتهوى نفسها وخليفه تحت امرها وين ماتبى بيوصلها.

بو محمد: الي تامر به بيستوي طال عمرك.. ولو بتخلينا على هوانا هذا كله ماله لازم خفو على عماركم والتبذير ماله داعي هاي نعمه تبى من يحفظها.

بو خليفه: طال عمرك انا الي عندي والي ورايه و دوني كله لخليفه وخوانه ودامني حي ماببخل عليهم ابشي بشرغهم وبهني عليهم...والمال طال عمرك مب خساره يوم انته بتفرح به اهلك وعيالك ..خلهم يفرحون دامنا عايشين الله لايقصر عليهم ابشي .

بو محمد: تمام عيل على هواك الي تشوفه مناسب سوه.
قام بو خليفه وترخص من اخوه مويه صوب بيته وعياله...
نش بو محمد ودخل البيت وفي الصاله شاف الحرمه وعياله يالسين يطالعون التلفزيون
يلس عدال حصه ولوا عليهاا وحبها على خدها و راسها وتم ظامنها عداله... حس ان بنته بتفارجه وهوه مايحب حد في الدنيا ويغلى حد كثر حصه .. كلهم تمو يطالعون حصه وابوها ..
قالت ام حصه: شو هالوله اليوم على حصه غير عن العاده ههه
بو محمد: وانا منو اغلى من حصه عندي في هالدنيا دومها حصه فديت روحها ماخذه الغلا كله ههه
بدت الغيره في عيون اخوان حصه قالت مريم : افا يابويه ماهقيتها منك يوم انا العوده والبجر ما ينولني شي من هالغلا ههه
بو محمد: عنبوج انتي... اسكتي محد كثرج تبزا علينا ماخليتي شي من البزا حق خوانج ههه
ناصر:لا انا احتج.. هيه العوده وبزيتها وهاي عاد دلوعتك حصه بعد ماقلنا شي ...وانحن شو مالنا رب ؟؟ههه
قامت ام حصه وسارت لوت على ناصر وحبته وقالت: فديت روحك انا.. انته دلوعي انا ..كله ولا نصوري انته ماعليك منهم الي تباه من دلع بتحصله عندي ههه
بو محمد: راح الولد خربته ههه شدي عليه خليه يستوي ريال لاتدلعينه الدلع للبنات والريال ماله الا الشده تربيه
ام محمد: يعلي انشالله اشوفهم رياييل واشوف اعيال اعيالهم يارب
مريم: ها حصه اشوف اليلسه عابتنج اهناك ههه قومي بسج دوري
قامت حصه لوت على ابوها وقالت :حرام عليكم ابو ويدلع بنته انتو شو حارنكم.. فيكم حسد يعني.. انا قررت اني مااخوز عنه.. واليوم بيرقد عندي بعد غياض فيكم ههه
ام حصه: إإإيه... ابوكن مريض ماعن ثره عليكن خوزن عنه
ضحكو كلهم على ام حصه وقال بو محمد: خليهن فديت روحهن ...انا بخير منو قالج اني مريض ولاتفاولين عليه يالعيوز.
حصه :ههه امايا اشوف الغيره عدوا وانتقلت لج ... وبعدين لا تفاولين على باباتي فديته خليه يبزينا .
ام حصه: شباه اغار عليه شيبه الحين راحت عليه ههه

 

 

[غفران-الامارات]

بو محمد: ههه غربلاتج يالعيوز بتودريني يعني الحين ..؟!!
ام محمد: شو عيل تباني اغار عليك وانحن في هالسن....تبانا ناخذ زمنا وزمن غيرنا... انا يابوك الغيره مخليتنها حق مريم وعبيد تغار عليه ويغار عليها.
مريم: فديت انا بو سالم الله يرده بالسلامه انشالله لاتطرونه اليه الحين ..بروحي متولهه عليه
(مريم متزوجه ولد عمتها ..وحامل في السابع ويتريون ولي العهد سالم)
ام محمد: استحي عاد بعدج لو تارسه البيت اعيال ... ما تتفدينه جدام حد ..منقود
مريم: ههه ريلي ياويلي مب حرام عليه.
حصه : امايا خلاص الزمن تغير.. عيل شقى الريال بيستقر وبيرتاح لازم الحرمه تظهر له غلاته وتدلعه وتتفداه جدام اهلها وهله بعد ههه.
ام محمد: ههه اسميكن مب هينات ...بنات اليوم ما يغترهن شي..علومكن هاي مب زينه لاتتسمعن لربيعاتكن ..سيرن على رمستيه وتبعنهااا..
بو محمد: البنات يعرف شقى يحرسن رياييلهن لاتخربين عليهن انتي ههه شورج مب نافع...
ضحكن البنات على رمست ابوهن وغمزله بالنصر
نشو العيال صوب حجرهم بيرقدون وفتح بو محمد موضوع عرس حصه بخليفه واستانست ام حصه للخبر وسارت بتخبر حصه
ام محمد: حصه بنتي.. شو رايج بولد عمج خليفه؟
حصه فهمت الموضوع وماعرفت شو تقول لأمها تمت ساكته
ام محمد: بو خليفه رمس ابوج اليوم وبيحددون العرس قريب انشالله ..وبيتج وبيت خليفه زاهب وعدالنا مابتسيرين ابعيد عنا ويبونج تختارين ديكوراته وتعدلينه على ذوقج
حصه: اماه هالكلام بدري عليه انا بعدني ماخلصت الثانويه ونتو استعيلتو..
ام محمد: العرس مابيستوي لين ماااتخلصين انتي وماباقي شي شهرين وبيخطفن.. وما نبى منج شي الحين اهتمي بدراستج... بس بعد من تخلصين خذي وقتج ورتبي حاياتج كلها ومابيستوي شي الا بشورج.
حصه: على خير انشالله
نشت ام محمد عن حصه وراحت حجرتها بترقد

تمت حصه طايحه تفكر في سالفة العرس ..حست ابظيقه اشوي ..ويمكن حطت في خاطرها ليش هيه ماالها شور في عرسها.. ليش امها ما سئلتها اذا هيه تبى خليفه ولد عمها والا لا...؟؟وليش اهلها ما معبرين رايها ولامسويلها سالفه..!!
بس ردت وقالت ..اهليه يبولي الخير والي فيه مصلحتي وانا مابضوي حد احسن من خليفه ولد عمي .
برغم ان حصه كانت في داخلها تحب خليفه ولد عمها وعاجبنها بس بعد هالشي ماظهر لاي حد .. وخليفه نفسه ماكان حاط في خاطره حصه لانها اصغر عنه بوايد ..
نامت حصه وصورة خليفه في بالها مافارقتها بعد ماتعبت من التفكيرفي موضوع العرس الي اهلها فاجؤوها به.

بالباجر انتشر الخبر بين الاهل والكل فرحان بالسالفه وام خليفه تتصل بام محمد اختها وتسمع رايهم وشو بيسوون وتتخبر عن اخبار حصه وعلومها عن العرس والفرحه مب سايعتنهم

في بيت بو خليفه كانو مجتمعين على الغدا والكل يرمس بسالفة حصه وخليفه
بو خليفه: خليفه نباك اتبيض الويه.. حصه خلها في عيونك هذي بنت عمك انا مابوصيك عليها.
خليفه: لاتوصيني على بنت عمي يالوالد .. حصه بحطها على راسي وفي عيوني مايهمكم.. بس يالوالد ماتشوف عمرك استعيلت بالعرس اشوي ..البنت بعدها صغيره وانا مب مستعيل خلوها تكمل دراستها عقب يصير خير ...
بو خليفه: ليش استعيلنا ..!!؟ ام كم تباها البنت .. ام ثلاثين والا اربيعين لين تاخذها..!! البنت حرمه ومب قاصرنها شي ولو تبى الدراسه بتكمل في بيت ريلها محد بيردها.
خليفه : بس يابويا..
بو خليفه : لا بس ولا شي بنت عمك مب ياهل البنت حرمه وساده البيت.
ام خليفه: خليفه ابويه ...بنت عمك حرمه وعقلها ماشالله .. افهم عن بناتنا كلهن بس جان شي في خاطرك غير ارمسبه .. محد بيغصبك على شي ماتباه
بو خليفه: ها خليفه شو في خاطرك على بنت عمك؟
خليفه : الوالد .. الوالده .. حرام اني اخير عن حصه مابضوي وحصه غاليه من غلات روضه وظبيه عندي وابالها الخير ... بس انا من رايي لو ان خالد ياخذ حصه احسن... من سنه وتناسبه اكثر مني
خليفه : الوالد .. الوالده .. حرام اني اخير عن حصه مابضوي وحصه غاليه من غلات روضه وظبيه عندي وابالها الخير ... بس انا من رايي لو ان خالد ياخذ حصه احسن... من سنه وتناسبه اكثر مني..
بو خليفه: خليفه .. انا رمست عمك وخلصنا الموضوع عليك انته مب على خالد .. والعرس عقب ماتخلص حصه انشالله وغير هالرمسه ماعندي .. شوف عمرك وتشاور.. ولو هالشي مب عدل مابغصب حد عليه ..بس خساره تفرطون بنت عمكم من ايديكم وانا في خاطريه انك انته تاخذ حصه ..حصه مب ياهل يسدن تراحيبها ومايوبها عند العرب يوم بتلفيهم .

خليفه: الوالد كل شي بالضراابه الا العرس تراه بالاتفاق ..والهداوه.. والتشاور..انا حصه بنت عمي بس انا ماشوفها تناسبني ولا انا اناسبها...!!!
بو خليفه: ابويه انا ابوك واعرف الي يناسبك ولو بنت عمك ولو منو تكون من البنات مابيوزها ولديه الا اذا هيه تستاهله... تعوذ من ابليس ...وخل الشور عندي.
خليفه يأس من ابوه : سو الي يناسبك الوالد انا مالي شور .

قام بو خليفه وسار صوب حجرته .. كان الجو متكهرب اشوي في بيت بو خليفه ماحد توقع ردة فعل خليفه تكون جيه.. خليفه ماكان في خاطره العرس بس ماعنده سبب للرفض ..حصه بنت الكل يتمناها جمال واصل واخلاق وبنت عمه بس المشكله انه يشوفها صغيره وايد عليه وما يعرف كيف بيتفاهم مع ياهل وبتكون حرمته وها الشي كان مخوفنه

المسا .. قامت روضه واتصلت ببنت عمها حصه ..
حصه: روضه ماتشوفين اهلنا استعيلو في الموضوع اشويه.. انا احس ان في شي غلط بس مب عارفه شو هوه.
روضه: انتي يتهيئلج هالشي لان السالفه توها يديده عليج... بس في ذمتج حصه مب فراحنه لانج بتاخذين خليفه اخويه؟
حصه: بصراحه روضوه... انا من زمان خليفه يعجبني ..وايد احسبه غير دخلته علينا وهيبته ..بس ماكنت ادري اني باخذه ..كنت اشوفه عادي مثل اخويه محمد .
روضه: انزين انتي بصراحه تحبينه ؟
حصه: روضه شو هالمصاخه..!!
روضه : عادي مافيها شي ..
حصه : اوكي انا احبه... بس عقب العرس الحين مااعرف كيف احبه وايد مرتبكه من كل شي ... واحس اني لو اشوفه اني بشرد مابجابله ههه.
روضه: ههه غربلاتك تطورت العزبه .. ماحيدج تتشردين عن حد.. قبل مطيحه الميانه ويا عيال عمج الحين بنستحي .... اااه يامكر البنات ههه
حصه: مادري روضه احس.. احس بشي غريب بيستوي لي احس برعشه وخوف بس في داخليه شي يقولي اني احب خليفه ومادري احس اني مستانسه واحبه ومرات خايفه ومتردده .
روضه: ههه يعني انتي تحبينه يالدبه .. ليش ماتقولينها ليش تيودين هالشي عنااا ..
حصه: روضه انا كنت معجبه بخوج... بس بصراحه .. شكلي من دريت اني باخذه بديت احبه ههه
سكرت حصه عن روضه ونشت حجرتها .. كان خليفه ماخذ كل تفكيرها ..ماتنلام كان ولد عمها وحبيبها الي بدت تفكر فيه كحبيب وبيكون ريلها عن قريب انشالله
عقب ماكان مثل اخوها ...
بس حصه ماكانت تعرف شو شعور خليفه ناحيتها ...والمصيبه خوف خليفه من انه ياخذ حصه الي يشوفها ياهل ... خل الكل يحس بالزعل على حصه ..معقوله حصه تحب خليفه عقب ماخطبها وصارت تفكر فيه كريل وهوه يحاول يتهرب من هالعرس بأي طريقه ..شو بيكون مصير حصه مع خليفه ..
مرت الايام وحصه مشغوله في دراستها وبنات عمها وياها كل يوم يدرسن وعقب ييلسن يسولفن عن عرس حصه وخليفه وماعند العايله الا سالفه العرس ... بس محد كان يعرف شو في نفس خليفه ... خليفه كان مب راضي عن العرس ولا يباااه ..بس ماقدر يسوي شي .. ومافي ايده شي يسويه ... فضل انه يسكت ويخلي العايله تفرح وتستانس ... وخاصه عقب مادرت حصه بالعرس ومارفضت ومااعترضت ماقدر انه يضايقها والا يجرح شعورها ..
كان خليفه ما ييلس في البيت دايمن يطلع .. ويتجنب انه يلاقي حصه في بيتهم والا في بيت عمه ... ماكان يكثر الزيارات عليهم وحته عمه كان دايما يتخبر عنه ... بس الكل كان يقوله ان خليفه مشغول في العرس ويرابع شرق غرب عسب الترتيبات والمشتريات والحجوزات .. ماكان حد يدري انه خليفه كان شال ايده من موضوع العرس نهاائي وانه رفض انه يسوي شي في عرسه ..
ماكان الوضع عاجب ابو خليفه وامه ..خليفه مب من عادته انه يتصرف جيه ..كان ريال البيت ومايعز شي على هله وهو الامر الناهي عقب ابوه ...وحته امه وخواته كان مسؤول عنهن مسؤوليه كامله .. خليفه انسان طيب وبيتوتي ويحب اهله وايد ..بس ماكان يحب ان ينغصب على شي .. كان حاط في خاطره كيف انه عقب الي يسويه لهله وطيبته ومعناه عندهم يجازونه جذيه ولا يسووله راىي والا حته كلمه في عرسه ...

مر شهر على هذي السالفه وقربن الامتحانات .... كان يوم الجمعه وحصه وامها وخوانها يالسين في الصاله يتريون ابوهم يظهر بيدخنون وبيسيرون المسيد ..ومثل كل جمعه كانو عيال عم حصه ايوون يسلمون على خالتهم وعمهم قبل مايسيرون الصلاه ... دخل خليفه واول مادخل طاحت اعيونه على حصه ..كانت يالسه تدخن ابوها وماانتبهت لخليفه يوم حدر .. حس خليفه بتأنيب الضمير ناحية حصه .. ليش هوه قاسي عليها .. ليش مب قادر يتقبلها حرمه له .. نزل عينه عنها ودخل وسلم .. نشو كلهم يسلمون على خليفه ويوايهونه .. سلم خليفه على عمه وخالته والتفت صوب حصه يسلم عليها .
خليفه: كيف حالج حصه .. عساج ابخير..؟!!
حصه : الحمدلله بخير ... شحالك انت..؟
تغير ويه حصه من شافت خليفه ... يتها رعشه وارتباك .. استحت منه ... كانت هاي اول مره تشوف فيها خليفه من عقب مارمسو في موضوعهم..نزلت اعيونها عنه ماكانت تقدر تحط عينها في عينه... هذا بيكون ريلها ... كيف ..؟؟ لين اليوم حصه ماتعرف شعور خليفه ناحيتها .. يحبها..؟؟ والا مايحبها..؟؟ هوه الي قال انه يباها والا كان اختيار اهله..!! حصه كان في راسها تساؤلات وايد عن خليفه ..بس محد كان يقدر يجاوبها عليهن..
يلسو كلهم وقال بو حصه لحصه : نشي حصه .. قهويي ولد عمج وعقب وديه المدخن.
خليفه: تسلم عمي ..انا توني متقهوي ومدخن وخالص في البيت .. لاتتعب حصه خلها مرتاحه ..
ام حصه : لا تعب ولا شي ..قومي حصه هاتي عصير لبو عجيل.
نشت حصه وسارت المطبخ التحضيري ..جهزت الخدامه العصير ويابته لحصه علشان توديه..حصه كانت في عالم ثاني ... خليفه كان وايد مأثر عليها..زقرتها الخدامه وعقب انتبهت حصه لعمرها وشلت العصير وسارت به الصاله .. جدمته لولد عمها ..


حصه: تفضل...
خليفه : سلمتي الغاليه
سارت حصه ويلست عدال ابوها .. خليفه لين الحين مانتبه لحصه ولا ناظرها ولا ابتسم الها ..معاملته الها طبيعيه مافيها اي مشاعر..حصه كانت تتريا ولو نظره من خليفه شي يحسسها ان هالانسان يودها .. يكنلها شي من الحب .. وان ما بينه الحين كان بيظهره الها بعد العرس
بس ما لاحظت عليه اي شي ..
يا وقت الصلاه وطلعو الرياييل للصلاه في المسيد.. تمت حصه واقفه تطالع الباب الي ظهر منه خليفه .. خليفه ماكلمها من يلس ولا كان يبتسم الها ..!! حست حصه بظيق .. سألت امها..
حصه: اماه يوم خذتي ابويا كنتو تحبون بعض والا ماكان يعرفج وماكنتي تعرفينه؟
ام حصه: انحن على ايامنا الحب موجود والناس تتحاب وتتواخذ ..بس انا وابوج رابين رباعه وييران..ويوم خطبني انا صغيره مااعرف الحب ..وعقب تحابينا
حصه شي في خاطرج..؟؟ ليش هالسوأل..؟؟
حصه:لا اماه بس اتخبر..
ام حصه: حصه بنتي خليفه ولد عمج يودج ويباج ولا ما كان بيتجدم لج.. انحن ولو نباكم البعض بس محد بيغصبكم ..وهوه بكيفه يباج واظن انه من زمان متخيرنج ويترياج.

استانست حصه على كلام امها وريحها اشوي.. قامت ودخلت بتصلي وتدعى ان الله يوفقها مع خليفه ويوفق خليفه في حياته .

بعد اسبوع بدت اجازة حصه وروضه وظبيه .. هالشهر بيتمن يذاكرن في البيت ويستعدن للامتحانات .. كانت حصه تسير بيت عمها وييلسن في حجرة روضه يذاكرن.. ومرات كانن ييلسن في الصاله..
حصه: ظبيه اسئليني وانا بجاوب احس اني انسى ابسرعه الي احفظه.
روضه: لازم تنسين حبيبتي .. ههه بالج مشغول في شي ثاني .. مب في الدراسه
ظبيه: ماتنلام خليفه ماخلى فيها عقل تذاكر ..تبات تحلم به وتصبح تفكر فيه ..والدراسه ودرتها النا ههه
حصه: مالت عليكن انا اصلا ماافكر في العرس وناااسيه السالفه مول وخليفه بعد ماافكر فيه.. وليش اصلا افكر فيه يوم هوه مافكر فيه ولا اهتم
وسوت عمرها زعلانه ... روضه وظبيه ارتبكن من رمست حصه.. مع ان حصه كانت تسولف ومب قاصده الي قالته ..وعقب البنات سون عمارهن يضحكن ..
ظبيه: اسميج انج !!.. استحي عنبوج شو تبين الريال لاصق في بيتكم مايخوز ليش ماشي مستحى ههه
روضه: هيه والله والا تبينه يدقدق لج تيلفونات ويتغزل فيج ههه ..ها الي تبينه؟؟
استحت حصه ..
حصه: لا عاد مب جيه ياغبيات .. افهمن .. الخطيب لازم يسيير على خطيبته يحسسها برغبته فيها .. يقولها انه يباها .. لعنبوه شقا وانحن عيال عم .. وحته الشوف مااشوفه..!!
روضه: غربلاتج جنه خليفه حاشرنا عليج ويباج اليوم قبل باجر .. بس انتي الي مأخره السالفه بإمتحاناتج .. وهوه مب شرط انه يقولج انه يباج تراج بتستوين حرمته وباجر بتسمعين منه هالرمسه لين تملين .
ظبيه: لاتستعيلين على رزقج ..
حصه: لا انا عادي ..بس عاد لاتطرن العرس طلعتنا من المذاكره وخربتن تفكيري
روضه : ههه آآه منج شفتي ان خليفه مخبلنج وماخذ تفكيرج عن المذاكره

في هاللحضه دخل خليفه عليهم في الصاله.. نشن كلهن يسلمن عليه..
روضه: حيالله المعرس ... تعال عروسك حشرتنا عليك.. كله اتخبر عنك ههه
استحت حصه واحمر ويها وتمت تدعي على روضه في خاطرها
خليفه: تخبرت عليها العافيه ..علومج حصه ..وعلوم الدراسه؟
حصه: الحمدلله كل شي اوكي.. ماعليك من رمستها هالحياله ...تراها تدور سالفه بس تتسلابها ههه
ظبيه: انزين عاد ولو تخبرتي عنه ترا ولد عمج مافيها شي ههه
قالتها ظبيه بخبث .. احرجت حصه وتم خليفه ساكت
روضه:خليفه تعال اسأل حصه تبى حد يذاكر إلها ..
خليفه : حاضرين ... شو ياحصه شو تبيني اسألج فيه؟
حصه: لا خليفه انا ماابى شي مشكور انا مذاكره ومخلصه
خليفه: افا ياحصه مب اول مره اسألج وتدرسين ويايه .. هاتي كتابج الغاليه خلي عنج المستحى .. انا مااعرفج تستحين ههه
حصه وهيه مستانسه في داخلها .. وشعور تملكها ناحية خليفه خلاها ماتعرف ترمس ولا تقول شي
قامت وشلت اكتابها وسارت صوب خليفه يلست حذاله ومسك هوه لكتاب وتم يقرا الاسئله
حصه تمت تطالع خليفه وهيه مب حاسه بعمرها .. تملكها شعور ناحيته ..حصه تحبه ..لا وبعد تعشقه.. خليفه سيطر على قلب حصه ومشاعرها من دون مايسوي هوه اي شي ولا حته يدري..
تمت تطالعه تشوف اعيونه خشمه لحيته شفايفه .. ويدينه وهيه ماسكه لكتاب وشعره وكل شي فيه .. قالت في خاطرها ياويلي كم احبه ... هذا حبيبي .. ولد عمي .. وريلي انشالله.. محد كان يعرف شعور حصه ناحية ولد عمها ..كان شعور يديد تملكها بس من حست ان هالانسان بيصير ريلها وبيكون حلال عليها انها تحبه ...مانتبهت لاي شي... من زمان ما يلست ويا خليفه وناظرته عن جريب .. كانت مستحيه منه .. بس خليفه كان عادي ولا افتكر بالي كان يستوي لحصه وهيه حذاله ...
طلعن روضه وظبيه بدون ما يحسوبهن .. وفي خاطرهن يبن يخلن الجو لحصه وخليفه .. يقولن انشالله ان خليفه يحس بحصه ويهتم ابها والا انشالله يبدا يحس ابحب صوبها.. كانن يبنه يفكر ابها كزوجه مش كأخت..راحن وتمن يترين خاري عند الباب مايبن يخربن عليهم ..
روضه: تتوقعين شي يصير .. خليفه بيغير رايه ناحية حصه
ظبيه: مادري.. بس حصه شكلها تحب خليفه اكيد بتقدر تغيره اذا مب الحين بعد العرس .. ومنو مايقدر يحب حصه.. حصه تنحب وتروح فيها ارقاب بعد
روضه : انشالله يارب وايد احب حصه وابى خليفه ياخذها
ظبيه: بس سكتي اخاف حصه تظهر وتسمع

في الصاله كان خليفه يسأل حصه مرات بكل جديه.. ومرات كان يمازحها ويضحك عليها .. وهيه اندمجت وياه وارتاحت اعصابها وخذت راحتها في الرمسه وياه..
خليفه: تقولين انج مذاكره ومخلصه ... هااه ليش ماتجاوبين صح ؟؟ ههه
حصه: لا انا اعرف بس انته تخوفني .. لاتسألني جيه كأنك بتاكلني شوي شوي عليه ههه
خليفه: شو ها الدلع بعد .. اصطلبي ماشي دلع في الدراسه ههه
حصه: خلاص خلاص اسأل من الاول
خليفه :شو ...!!! اشوف السالفه عيبتج ههه تبيني اسألج بعدني ..على هواج بنت راشد ... تزهبي عيل الحين الغلطه بضربه.
حصه: لالا شو ضربه بعد ههه هات اكتابي ماباك تسألني..
خليفه: الحمدلله ههه دوج اكتابج فكيتيني ههه
حصه : هيه جكيتك .. الحين هذا الي انته تباه ههه ماعليه بخبر ابويه ههه
خليفه: لا يوم السالفه فيها ابوج ..عيل هاتي كتابج وانثبري مكانج ههه
حصه: حشه حشه لاتسألني مابى يوم السالفه فيها ضرب انا انسحب من خاطريه هههفي هاللحضه دخلت ام خليفه عليهم.. جان تضحك من خاطرها يوم شافتهم ارباعه ..قالت في خاطرها ..فديتهم انا... الله يهدي خليفه وتعرف حصه كيف تلين قلبه وتخليه يقتنع بالعرس
نش خليفه وسار صوب امه وحبها على راسها ويابها عدالهم تيلس
ام خليفه: ها حصه منو بيضرب منوه ههه
حصه: هذا ولدج خالوه ناوي يضربني يقول ان الحريم مايمشن الا بالضرب ههه
ام خليفه زاغت :خليفه عنبوك ...بتضرب البنت ناوي
تم خليفه يضحك على امه
خليفه: لا امايا مب انا الي قلت ...ها بنت اختج ناويه تضربني متوحشه ظهرت ههه
حصه: بسم الله عليه .. ياربي مجذب ولدج خالوه.. انا بشرد عنه من شوي كان يبى يضربني والحين يقول اني متوحشه... بعد اشويه بيقول اني ساحره ..لالا انا سايره بيتنا مااتحمل هالمعامله ههه
ام خليفه: اسميك طفرت البنت .. شو يلسك عندها انته .. قبل نباك تيلس الحين مول لاتجابلها فكها منك ههه
خليفه: اسميكن حريم وتعاونتن عليه اكيد بتظهرني غلطان ... مبروك عليج البراأة بنت خالوه ههه انا بنش عنكن
دخلن روضه وظبيه وستانسن يوم شافنهم مستانسين
خليفه: توكن ييتن وين خليتني ويا هالوحوش حشه كلني ههه
روضه :منو وحوش ها امك وحرمتك محد بياكلك الا جان بيتضاربن عليك وبيطفرنك من زود مايغارن عليك ههه
خليفه برتباك : احم بنات وين سفرتيه ..؟؟
ضحكن البنات عليه
روضه:هكيه اهناك على الكرسي..حصه هاتي السفره حق ريلج ههه انحن مالنا خص الحين به وانتي موجوده ..
حصه: بيب له السفره بس مب لانه بيستوي ريلي ... بس علشان يفكني منه ويسير ههه
خليفه: بعدي من حرمتيه..والله فيج فايده ... وغياض يوم انج تبين الفكه اننا بنعرس بسرعه ههه
حصه: هيه يتحراني خدامه ... بس جدام العرس اسوي جيه ههه هذا كله الا الحينه عقب العرس غير ..
خليفه: هيه جيه السالفه زين يوم خبرتي على عمرج ههه امايا انا غيرت رايي ماباها .
ام خليفه: حافظ عليكم انتو من زمان بعيد ماحد رمس الثاني شو الي لمكم اليوم .. بتخربون علينا السالفه ههه
خليفه: الله يستر يامايا الحرمه طلعت مب هينه ههه
حصه: لا خالوه انا خلاص غيرت رايي بعد مابى ولدكم ههه
ام خليفه: انتو من صدقكم الحين ترمسون ؟؟؟
تمو ساكتين .. خليفه في خاطره يقول ... تدرين يامايا شو الي اباه بس ماشي فايده
وحصه سكتت ماعرفت شو بالضبط في خاطرها.. اليوم كانت وايد مستانسه ويا خليفه بس بعدها ماعرفت شو الي في خاطره ناحيتها ... كانت سوالف عاديه ومابين الها شي يأشر ان خليفه يحبها مثل ماهيه تحبه.. وسكوووت خليفه خلاها تترياه يرمس ...تقول يمكن يقول شي يريحها ... بس خليفه حط عينه بعين حصه وتمو يطالعون بعض ..وكل واحد يفكر ..خليفه يقول في خاطره..اخاف اظلمها ويايه وماتهون عليه اعذبها انا مااقدر احبها كزوجه هاي مثل اختي...
وحصه تقول في خاطرها..ليش ياخليفه ماتريحني ليش ماتقول اذا انته تحبني وتباني والا لا ..!!نفسي اسمعا منك وارتاح..

[Nathyaa]

يعطيج مليون عافيه ياااااااااااااااااااااااقلبي

[جمايل]

يعطيج العاااافيه غفرااان وسلم لنا ذوقج الراقي

[Ronaldinho]

يسلمو غفران على القصه الروعه