[grade="32cd32 Ff6347 0000ff Ff1493"]
طلابنا الحلوين
بما انه السنه الدراسية اليديدة مابقا عليها شي
ولازم كلنا نعطي كثر مانقدر عشان نتفوق في الدراسة
حبيــــت اقدم لكم نصائح ممكن تفيدكم في المدرسة
*ادخل المدرسة بنفسية جيدة...
كون نظرة متفائلة عن العام اليديد ولا تحبط نفسك بعبارات الفشل
والاستسلام من البداية ازرع في قلبك حب للمدرسة
وتذكر اهدافك وطموحك اذا حسيت بالتعب , وحط في بالك
الثمار اللي بتحصدها بالنهايه لانه دايم لما تذوق طعم النجاح يهون التعب كله
*استفيد من السنه السابقة...
طبيعة الانسان انه يتعلم من تجاربه السابقه..لذلك..تذكر سلبياتك وايجابياتك
العام اللي فات وحاول انك هالسنه تتغلب على السلبيات وتحافظ على الايجابيات
وحاول كثر ماتقدر انك تتغلب على الاخطاء والمشاكل اللي واجهتها
في السابق عشان ماتطيح في نفس المشكلة كل مرة ...
وشي معروف ان الانسان يخطي ويتعلم من اخطائه
قالها عبدالله رويشد (ابن آدم لوما عثراته ماتعلم )
(أجل بعدين كيف اربح لو ماحسب خساراتي )
*تهيأ نفسياً ونظم مواعيد نومك ...
تهيأ نفسياً قبل بداية المدرسة بفترة بحيث انك تستوعب ان العطلة
"أنـــــتـــــهــــــت"وصار وقت الجد الحين , وقت الالتزام يعني مافي
سهرات على النت والتلفزيون ولافي طلعات (الا الاربعا والخميس واليمعه)
وحاول انك تعدل نومك عشان تروح المدرسة وانت مصحح ومفتح عشان
تستوعب معلومات وماتدوخ على الحصه الرابعه (مثلي سابقا )
* حــب المواد ولاتخاف ...
حاول انك تحب المواد كلها ولاتهمل مادة بحجة انك تكرها ولا ماتفضلها على غيرها
لانه بالاخير بيتراكم عليك الحفظ والفهم لازم تعطي كل مادة حقها من الوقت والدراسة
والتركيز والمادة اللي استيعابك فيها بطئ حاول تفهمها حبه حبه ونشف ريج المدرس
عشان يشرحلك لين تفهم (عيل اهو شحقه مدرس ) ولاتصدق اللي يقولك هذي المادة صعبة...
وانا لما كنت مكانك مادري شلون نجحت ...(ياما قالولي هالكلام عن رياضيات اوله
ثنوي والحمدالله نجحت وبسهولة ) لانه كل شخص يختلف عن الثاني
*لاتنسى اصدقائك ...
استعين باصدقائك اذا احتجت مساعده فهم خير معين ولاتبعدهم عنك
وبادلهم الدعم والتجشيع والمساندة ولاتكتفي بصداقاتك القديمة كوَن صداقات
يديدة بالصف اللي بتكون فيه
ملاحظه : كونك قاعد بصف اكثر اللي فيه يحبونك بيكون هالشي عامل من
عوامل النجاح المضمون لانه بيكون تشجيع لك على الدراسة والمثابرة
وبالنهاية ....
اتمنى لكل الاعضاء الطلاب التوفيق والنجاح
واتمنالهم سنه دراسية سعيدة وجيدة مختومة بالنجاح
وانشالله كلنا ناجحين[/grade]