[frame="3 80"]الصبح يوم نشيت لقيت مروان عندي .. استغربت وسالته
( شو ماشي شغل اليوم )
( لا نويت افضي نفسي اليوم وايلس عندج)
( تسلم يامروان )
( ظبية انتي ليش ماوافقتي على راشد يوم خطبج )
سؤال مروان كان غريب .. بس رديت عليه
( لانه اناني .. وكان السبب في موت اليازيه وفوق هذا كله انا مابا احس اني اخون اليازيه وذكراها )
( بس هم كانوا يحبون بعض )
( انته قلتها يعني مب انا اللي احبه )
(الصراحه هو من فترة خطبج .. وانا قلت بشاورج ..)
( لا مابا .. بس خله يرجع لي عيالي )
( ظبية لاتنسين نفسج هم عياله )
( لا انا احق .. )
( بس هو يشوف العكس .. وبعدين هو كان يكلمني امس .. لانه سمع من عمر انج مريضه وتطمن عليج)
(كثر الله خيره .. وياريت يرجع عيالي .. )
( والله شو اقولج .. ظبية انتي تحبين الصغار واتحبين امهم )
( هذا سؤال يامروان .. اكيد .. انته تعرف شكثر كنت احب اليازيه وشكثر كنت اقدرها ووصتني عليهم وايد وربيتهم وشفتهم يكبرون جدام عيني هم عيالي يا مروان و لازم احبهم .. )
( انزين انتي تدرين انه اليازيه هي اللي موصتنه انه ياخذج )
صدمني .. كان رده صدمه .. معقوله ياليازية انج كنتي تحبين راشد وتوصينه يتزوج عليج .. اي قلب .. لج اللي قدر يتحمل هذا الاحساس ... اي قلب اللي قدر يحس ويتعذب ويخطط لاشخاص هو ماراح يكون بينهم .. فديتج ياليازية .. . كم احس اني ضايعه بدونج .. التفت على مروان وقلت له اني موافقه
( صدق )
( بشرط بس اكون ام لعياله ... ومب زوجه له هذا شرطي واذا وافق انا ماعندي مانع )
( بس ياليازيه انتي تحكمين على نفسج بالاعدام )
(مابا اي صله تربطني فيه الا ورقة .. هذا قراري .. وخلاص )
( خلاص يا ظبية اهم شيء انج تردين حق سعود وعبودي والله اني تولهت عليهم )
نش مروان من عندي حسيت اني ضايعه .. كنت بموت .. رحت صوب النت دخلت وفتحت رسايل جديده .. وارسلت رساله حق دمعه حزن
( السلام عليكم
دمعة حزن .. الايام اللي عشتها كانت من اجمل ايام حياتي .. وخاصه انني فقدت شخص عزيز علي مثلك وكنت احس باحساسك وانت تتعذب .. هذا الانسان ترك لي امان .. ولابد اني احافظ على هذي الامانه .. كنت اتمنى تنتهي ايامنا بسعاده و يكتب الله لنا حياة ثانية بس الحلم انطفى قبل لا ينولد .. وانا ادري انه زواجي راح يحرمني حتى من قراءة رسايلك .. فانا مقبلة على حياة .. ما اعرف كيف بعيشها
وشكراً
وردة شقى
وارسلت الرساله وكان في بالي اني خلاص ما راح ادخل النت ..
بعد يومين .. كان عمي .. في بيتنا ويخطبني رسمي .. كان ابوي فرحان وسعيد وامي كانت فرحانه رغم انها متخوفه اما مروان اللي ماقال حق اي حد عن شرطي كان يحس بتنيب الظمير لانه ماقال حق حد وحاس انه راح يظلمني بس توكل على الله ..وقرر انه يوم بيوصلني يخبر راشد.
بعد كم يوم ارسلي عمي مهري وفلوس زهابي 200000 الف .. مع ابوي اللي عطاني الفلوس ..
( هذي فلوس يا بنتي .. واذا نقصج شيء علميني )
( ابوي مابهم .. انا عندي كل شيء .. )
( لايبنتي انتي عروس ولازم تتزهبين .. واذا قصرتي انا حاضر .. )
( ان شاء الله يابوي .. )
ورحت صوب غرفتي .. شليت جوازي ورحت صوب البنك وفتحت لي حساب وحطيتهم .. وخليت عندي بس مبلغ بسيط حق خرابيط الزهاب .. لانه هم يبون جذيه وبالفعل اليوم الثاني كان مروان هو اللي يوديني عشان اشتري لي الملابس ..والزهبة .. وكان كل شوي يصير انش اتشري اشياء كنت اشوفها شيء مب مهم .. مره يقولي اخذي هذي البدااله ومره يقولي خذي ذيك .. واحيانا كان يدخل علي وهو شاري لي اغراض للعرس وفي اقل من اسبوعين كنت متزهبه ..ويوم عرف راشد من مروان انه خلاصنا ارسل حق ابوه توكيل .. عشان يملجون.. لانه هو كان في فترة امتحانات وكلها 3 اشهر .. ويرجع نهائي وخاصة انه بيته كان باقي له شوي ويخلص .. وكان مروان بيسافر معاي ويوصلني لراشد ويرجع عمر من هناك ..[/frame]