[frame="8 80"] انشوف مواضيع وايدة عن الكيك وطريقة عملها لكن بهالموضوع بنشوف شي مختلف عن الكيك واللي اهو ... طريقة تزيـين الكيك بالكريمة يعني اشلون انسوي هالحركات اللي اتكون فوق الكيكة .. مثل أشكال الورد وغيرها وقبل ما ابدي ابشرحي بذكر ان الايميل يتكون من 3 أجزاء لأن موضوعه طويل نوعا ما اوكي .. نحتاج لتزيـين الكيك معرفة شغلتين أساسيتين الأولى : اهي معرفة أشكال الرؤوس والأقماع اللي نستخدمها للتزيـين والثانية : وهي معرفة طريقة عمل لكريمة الخاصة المستخدمة للتزييـن أول شي بنشوف أشكال هالرؤوس والأقماع اللي نستخدمهم للتزيـين وعلى فكرة كل شكل منهم له رقم معين ثابت ما يتغير لو وين مارحنا لأي محل ونبي نشتريهم بنلاقي ارقامهم ما تغير .. اهي نفسها ابكل مكان وان حبيتوا تشترونها بتلاقونها بالمحلات لكبيرة المتخصصة ابهالأمور بالقسم الخاص لأدوات شغل الكيك وتزيـينه انزين .. لنفترض انج بتزينـين الكيكة عالسريع وما تبين ذيج الحركات والسوالف الوايدة عليها .. فاهني ممكن نستخدم كيس الشمع العادي المعروف ب "Parchment Bag" وهذي اهي طريقة سوايته 1 قصي مثلث من ورق الشمع بضلع طوله 15سم من كل جانب لاحظي اشلون وضحت الزوايا وبنسمي كل زاوية ابحرف A , B, C علشان توضح عندج الزوايا وتعرفين بعدها شتسوين بالضبط مع كل زاوية الحين .. مسكي مثلث الورقة وخلي زاوية B بتجاهج 2 لفي زاوية A B مثل الصورة ووديها فوق زاوية وبجذي يكون عندنا " قمع ورقي " من نص المثلث 3 الحين مسكي طرفين الزاويتين A,B بعدين لفي عليهم من فوق طرف الزاوية الثالثة C باتجاه اليمين وبجذي تتقابل كل الزوايا الحين عندج قمع شمعي كامل 4 والحين مسكي الكيس بيديج وبحركة خفيفة بالإبهام قومي بسحب الزاويتين A,C بإتجاهات متعاكسة الغرض من هالشي اهو أنج تتحطمين بمقاس رأس القمع أو الكيس من فوق اما تخلينه صغير او كبير حسب النقشه اللي تختارين رسمها عالكيكة 5 حطي الكريمة لي نص الكيس بس بعدين لفي أطراف الكيس وطويها علشان ما تتسرب الكريمة منها أثناء الضغط عليها .. بعد جذي قصي طرف الكيس قصة صغيرة علشان اتزينـن فيها .... يتبع[/frame]
Nathyaa