والقصة عن ثلاثة شباب ( ثلاثي مرح ) جار عليهم الزمن ومرت عليهم قصة ونبدا هالقصة بالتعريف عن ابطالها وهم سلوم واحمد ونعيم ( اسم الاخير مدري وش يبي ) وحتى تكون القصة مفهومة اكثر لابد من التعريف بالشخصيات ونبذه مختصره عن كل واحد فيهم :-
سلوم : طوله 4 يارده ، ووزنه 80 رطل ، يقدر كورن فليكس على الريق ، يسمونه في حارتهم الطفل الكبير لانه يشبه العملاق الفرنسي ، يحب يعتمد على نفسه كثير خصوصا لما يشيل خيشة رز والا قطمة سمنت ، ويمووت في اغنية شنكوتي .
احمد : نحيف وعصقول ، طوله مربوعه ونص ( مربوعه = اخشبه طويله ) ووزنه ان ماخانني الظن 13 انش ، صوته جلف ( جلف = خشن مره ) ويكره الاصوات النشاز لما تسمعه يتنحنح من بعيد يجي في بالك ماطور مخيم على طول ، امنيته يلعب في فريق ريال مدريد ، ويحب اغنية ياغصن لبان .
نعيم : ولد مثقف مايسمع ارابيك ، مملوح بنسبة 70سم ، هوايته التسلق وكان يمارسها في منور بيتهم ( منور = مساحه صغيرة بين بيتين فيها مواصير التهويه ) ، نصاب كبير ( من النوع اللي ينطل النصبه وهو مغمض ، وفي راويه اخرى يشوت من نص الملعب ) ، يحب يقص شعره عند كل شي بريالين ، ماينعطى وجه ، وعنوانه في الحياه لا لنقل المعلمات .
كان الثلاثي المرح سلوم واحمد ونعيم من اكبر الحرامية بالرياض ، كانت البداية لهم في سوق اوشيقر الى ان اعلنوا احترافهم في سوق الحمام ومنها تطورت مهنه السرقة عندهم لدرجه ان طموحهم في السرقة كل يوم يزيد الى ان وصل طموحهم انهم يسرقون سيتي بانك العالمي .
ويوم من الايام حصل تحدي بينهم على اللي يسرق شي يكون سعره غالي ، فطلعوا الثلاثي المرح مع بعض على سيارة ، قال احمد هاه ياعيال من وين تبون التحدي ، رد نعيم ياليت نبدا من كودو ، في اللحظة هذي سلوم صفق نعيم على قفاه ، وصار يتكلم بزعل يهاوش نعيم ، بالله انت ووجهك ذا اللي كنه عشى هنود في عمارة عظم تبي بداية التحدي تكون في كودو وشرايك بالله يا احمد في هالدلخ القاعد ، قال احمد ياولد فكونا من الزعل خلونا نروح البطحاء فيها اجهزة اكترونية واجد ومن هناك نبدا ، وصل الثلاثي المرح للبطحاء ونزلوا واسرقوا ورجعوا للسيارة ، عقبها طلعوا بيت سلوم ، وجلسوا بالملحق وقام كل واحد فيهم يعرض اللي سرقه .
سلوم : سرق جهاز تلفزيون 60 بوصه .
احمد : سرق كاميرا فيديو .
نعيم : سرق فلينه علاقي .
فاز سلوم بالتحدي وقاموا الشباب يضحكون على نعيم وانقلبت ذيك الليلة ضحك وفرفشه وتعليق على نعيم وصار احمد يصور الشباب بكاميرا الفيديو وكل واحد يستهبل قدام الكاميرا ويطامر وقام كل واحد يتكلم عن نفسه واللي يقول رقم بيتهم واللي يطلع جوال مسروق وكل واحد بدا يقول عن بدايته وعن كل الاشياء اللي سرقها وسجلوا الفيلم على شريط فيديو علشان يحتفظون فيه للذكرى .
وتدور الايام ويجي ذاك اليوم اللي بيشدون فيه اهل سلوم لبيت جديد ، لان بيتهم اشتروه منهم شركة كبيره حقت مواد بتروليه ، وفي وقت ما انقلوا اهل سلوم كل العفش نسى سلوم الشريط ولايدري وين ضيعه ، لما وصلت الشركة للموقع ومعاهم المهندس انطوني فجاءه لقى انطوني الفيلم وخذاه معه .
انطوني : واحداً امريكي اشهب مزلوغ شنبه ، مطلوب من الـ اف بي اي بتهمة ايواء متخلفين ، متزوج اخت بروسلي ، تعرف عليها في سوق الزل في الصين وعندهم بنت عمرها 17 سنه .
ذيك الايام يوم تزوج انطوني وكانت اخت بروسلي حامل ، قال اسمعي يامره (Look at me ya Marrah ) ازا هزا بطن كبير انتي يجي ولد انا في اختيار اسم ، وازا هزا نفر يجي بنت انتي في اختيار اسم ، ردت اخت بروسلي كلك نظر يا اؤمري ( خوال انطوني هنود ) ، وجاهم بنت واحتارت اخت بروسلي وش تسميها ، قامت وجابت لها تنكه تمر فاضيه وطلعت في راس سور الصين العظيم وانطلت التنكه ، وقامت تتسمع لصوت التنكه ، شنق .. لنق .. بنج .. طنق ، اعجبها اسم " لنق " فاختارته اسم لبنتها وصار انطوني في الشركة ما ينادونه الا يبو لنق .
عاد يوم انطوني لقى الشريط خذاه معه ورجع للبيت شغل الفيلم الا وذ الدشير يطامرون قدام الشاشه ويستهبلون قام وترجم كل كلامهم لقى الشباب حراميه ، قال انطوني بنفسه ياولد ليه ما استغل هذولا المهبل واخليهم ينفذون اشياء لي والا اورطهم مع الشرطة والدليل معي .
قام واتصل عليهم وطلب منهم موعد يبي يقابلهم وبالفعل تقابل معهم في بوفيه الشراع بالسويدي قال لهم : شوف يا ثلاثة نفر انتا لازم هالحين مساعدة علشان يسرق بنك ويجيب حق انا 100 الف دولار عدا ونقداً والا انا في كلام شرطة بعدين انتم جنجال ( جنجال = السجن بلغة ابو هناده ) ، عاد نعيم مسوي انجليزي خصوصا انه مايسمع ارابيك قال اوكي صديق احنا يسرق بنك بس يجيب انتا فيلم ، قال انطوني طيب ، وتم الاتفاق بينهم .
وقتها الثلاثي احتارو شلون يبون يسرقون البنك !!؟ وكل واحد قام يقترح فيهم وكان اقتراح احمد هو الافضل من بين الاقتراحات ، فقال احمد : ياعيال ترى سرقة بنك صعبه ولكن انا اقول دام انطوني بيشارك معنا في العملية نسوي مثل فيلم هييت ( Heat ) وانا اصير مثل روبرت دانيرو ( ممثل ايطالي ابوه مساهم في اسواق المتنبي ) وباخطط لكم وانتم تنفذون ، فقام سلوم وطلع راح لواحد من اخوياه علشان ياخذ من عنده اسلحه لزوم سرقة البنك فاخذ من عنده اسلحه خفيفه ( مدفع ، بازوكه ، ديناميت ) ورجع للشباب ووزعها عليهم ، عقبها طلع احمد وجاب للشباب اكياس ورق ( زي حقت ماك دونلدز ) علشان يغطون فيها وجيههم ولاحد يعرفهم ، اما نعيم طلع لمحل ملابس جاهزة شرى له شراريب العائله لان الجو كان بارد ، واتفقوا انهم قبل صلاة الظهر قبل يقفل البنك يقابلون انطوني عند البنك ويدخلون ويسرقون الفلوس ، يوم جاء الوقت المحدد تغطوا بالاكياس ودخلو سلوم واحمد وانطوني البنك اما نعيم برى في الهايلكس حق سلوم يحتريهم ، يوم دخلوا قام انطوني يصيح على الناس This's a RAID .. No body Move (هذا هجوم .. لاحد يتحرك) قال سلوم يا انطوني اركد يخوي ترى هذولا مايدرون وش انت تهذر عليهم ، رد احمد الواقف جنبهم يتكلم بصوته الجلف يقول للناس لاحد يتحرك خلونا نشوف شغلنا عقبها اصرفوا على كيفكم ، فقام انطوني واتجه للخزنه وسرق الفلوس ، وهربوا وتمت العميلة بنجاح .
توجه الثلاثي المرح مع انطوني على بيت سلوم وجلسوا في الملحق فطلب سلوم الشريط من انطوني فرفض يعطيهم لانه يبي يستغلهم في عمليه ثانيه وهي سرقة محل ذهب !؟
قام سلوم وبغى يضرب انطوني فقام احمد ونعيم قالوا يامهبول تبي تضربه وبعدين يروح للشرطه يعطيهم الشريط وتوهقنا ، فقالوا لانطوني خلاص موافقين ولكن خلها بعد شهر علشان لاننفضخ تونا سارقين بنك ، قال انطوني اوكي وطلع من عندهم ، فجلسوا الثلاثي يفكرون شلون ياخذون الشريط من انطوني ويفتكون منه ىنه راح يطلب منهم عمليات ثالثه ورابعه .. الخ !؟
قال سلوم انا اشوف اننا نروح للشرطه ونعلمهم كل شي وزي ماتجي تجي ، رد احمد قال لا ماينفع ولكن انا اشوف اننا نخلي نعيم يتعرف على " لنق " بنت انطوني ويخليها تجيب لنا الشريط قال نعيم انا موافق ولكن لازم اعرف فتى احلام هالبنت والمواصفات اللي تحبها في الرجل وانا بالعب الدور !؟
لنق : بنت ولا كل البنات ، شعرها اشقر وخصرها نحيف وترقص راب ومحترفه كراتيه ( جدها بروسلي الله يبيحه ويحلله ) درست الابتدائي في مدارس بكين الاهليه وتخرجت من الثانوية السابعه عشر في الدرعية ، تحب الالعاب الخفيفه مثل الكيرم وهوايتها تجميع الشباصات .
قاموا الشباب وجمعوا المعلومات وعرفوا كل شي عن البنت ، ونعيم دخل دورة انجليزي علشان تتحسن لغته ، وبدو الشباب يجيبون اشرطه رقص راب يدربون نعيم عليها ، وحلقوا شعره خلوه مثل الديك ( زي بيكهام لاعب انجلترا ) وقام يتعرف على اجانب وصار يروح الاسكان الخاصه حقتهم وصار وضعه تمام ، يوم جاء وقت احتفال راس السنه ويطق له نعيم ذاك الهيلا هوب اللي ماحصل مثله لا في اللون ولا في الشكل ، وذيك الفلينه المشخله ويلبسها ويطلع على حي السفارات ، ويدخل السفارة الامريكية والعالم هناك مافيه الا رقص ونفيخات وضحك ، ويناظر ويناظر الى ان شاف لنق جالسه لوحدها وهو يجي قدامها ويقوم يرافس ( يرقص راب ) وهاتك مرافس الى ان البنت قامت تضحك وقامت ترقص معه وخشت مع الولد وقدر يتعرف عليها وصار يكلمها وتكلمه وبدت تتعلق فيه وبدا عاد يثقل عليها الى ان طاحت في حبه ، وتطور وضعهم الى ان صارت تترك له هدايا في محل اسبيشل فور يو ، وتسدد جواله ( لوووول ) وخلاها تجيب له الشريط ونفذ المطلوب منه بالتمام .
يوم اجتمعوا الثلاثي سلوم واحمد ونعيم قالوا الان لازم نكسر هالشريط ونصلح غلطتنا ونبلغ عن هالمجرم انطوني ونقول انه هو اللي سرق البنك لوحده ، وبالفعل طلعوا للشرطه وبلغوا عنه وامسكت الشرطه انطوني وحكموا عليه بالسجن مؤبد والجلد حتى ماقبل الموت ، اما زوجته اخت بروسلي يوم درت بسالفة زوجها انطوني جاها بكتيريا في المفاصل سببت لها آلم في النخاع المستطيل ومنه صار نزيف حاد في الاثنى عشر وفطست ودفنوها جهة اسكان الخرج ، اما لنق اخذتها جدة نعيم شغاله .
بالنسبة للثلاثي المرح ، فسلوم صار قهوجي في ابو هيثم ، واحمد مدرس جغرافيا ، ونعيم فتح محل ملابس نسائيه
وانشاله تعجبكم
06-11-2004, 11:49 PM
ثلاثه نفر
المواضيع المتشابهه
